Bilow cusub iyo doorasho dadweyn: Diiwaangelinta Cod-bixiyeyaasha oo Ka Bilaabatay Magaalada Muqdisho.
Muqdisho– Guddiga Madaxa Bannaan ee Doorashooyinka Qaranka iyo Soohdimaha ayaa si rasmi ah u daahfuray diiwaangelinta codbixiyeyaasha, Talaadadii, 15-ka Abriil 2025. diiwaangelinta heer qaran ayaa markii ugu horraysay laga bilaabay Degmada Shangaani ee Magaalada Muqdisho.
Sida ay sheegeen Guddiga Doorashada, diiwaangelintu waxay mari doontaa wajiyo kala duwan. Wajiga koowaad iyo labaad waxaa xoogga la saarayaa diiwaangelinta codbixiyeyaasha ku nool Magaalada Muqdisho, iyadoo la rajeynayo in diiwaangelintu gaarto qeybaha kale ee dalka, gaar ahaan Dowlad Goboleedyada xubnaha ka ah Dowladda Federaalka, bilaha soo socda.
Mas’uuliyiin kala duwan, oo uu ugu horreeyo Ra’iisul Wasaare Xamse Cabdi Barre iyo xubno ka mid ah golihiisa wasiirrada, ayaa ka qeybgalay diiwaangelinta maalintii labaad. Sidoo kale, sida ay muujinayaan muuqaallada iyo sawirrada laga helay goobaha diiwaangelinta, dadweyne aad u fara badan ayaa safaf dhaadheer ugu jira si ay isu diiwaangeliyaan, taasoo muujinaysa rabitaanka iyo ka go’naantooda inay codkooda ku doortaan wakiilladooda heerarka kala duwan ee dowladda. Rabitaanka iyo dhiirranaanta shacabka ayaa si weyn looga dheehanayaa goobaha diiwaangelinta.
Guddiga Madaxa Bannaan ee Doorashooyinka iyo Soohdimaha, oo la dhisay dabayaaqadii bishii Nofeembar 2024, ayaa muddadii koobnayd ee ay shaqeynayeen ku guuleystay inay hirgeliyaan tallaabadii ugu horreysay ee doorasho qof iyo cod ah — arrin muddo dheer shacabka Soomaaliyeed ku hammiyeyeen. Waxaa la xusuusan karaa in ay ka soo wareegtay in ka badan 55 sano tan iyo markii ugu dambeysay ee shacabka Soomaaliyeed si toos ah u doorteen wakiilladooda, marka laga reebo shacabka ku nool Somaliland oo doorashooyin dadweyne si joogto ah uga qeybgalayay 25-kii sano ee la soo dhaafay, iyo Puntland oo dhowaan doorashooyin golayaasha deegaanka hirgalisay.
Markii la soo gabagabeeyo heerka diiwaangelinta codbixiyeyaasha, Guddiga Madaxa Bannaan ee Doorashooyinka iyo Soohdimaha ayaa qorsheynaya inay qabtaan doorashooyinka heerarka kala duwan—doorashada golayaasha deegaanka, baarlamaanka, iyo madaxweynaha ee heer dowlad-goboleed iyo heer qaran, iyadoo doorashada ugu horreysa ay noqon doonto tan golayaasha deegaanka.
Ugu dambeyn, inkastoo ay jiraan caqabado badan oo dhanka siyaasadda, amniga iyo farsamada ah oo ku xeeran qabashada doorasho dadweyne oo heer qaran ah, haddana waxaa lagama maarmaan ah in la bilaabo doorashada golayaasha deegaanka—maadaama ay tahay tan ugu sahlan, uguna yar caqabadaha. Doorashadan ayaa sidoo kale siin karta Guddiga waayo-aragnimo iyo casharro muhiim u ah qabanqaabada doorashooyinka kale ee dhiman.
Ku xirnow bogga Puntland Online si aad u hesho warar iyo xogo sugan.
